වැස්ස + දෙවියන් + වස්සවලාහක සූත්‍රය

 

ත්‍රිපිටකය පිලිබඳව කුරුස ළකුණ දරන නිරාගමික සහ හෙල බුදුන් කන්ඩායම් ගෙන එන ව්‍යාජ මත වලට පිලිතුරු සැපයු පෝස්ට් වල සංවාදයට පැමිනි නිරාගමිකයන් ත්‍රිපිටකය සම්පුර්ණයෙන් බුද්ධ දේශිත නොවන බවත් ඇතැම් කරුනු හා සූත්‍ර පසුව එක් කර බුද්ධ දේශනාව අස්වාභාවික අද්භුත එකක් බවට පත් කර ඇති බවත් පවසා ඇත.

එසේම ඊට උදාහරණයක් ලෙස ඔවුන් විසින් වලාහක සංයුක්තයේ සූත්‍රයක් වන වස්සවලාහක සූත්‍රය පෙන්වමින් වස්සවලාහක දෙවියන් කම්සැප විදින අවස්ථාවේ දි ඒ හේතුවෙන් වැස්ස ඇතිවන බව ඒ සූත්‍රයේ ඇති බැවින්ද, වැස්ස ඇති වීමට දෙවියන් හේතුවක් නොවන බැවින් ද එය බුද්ධ දේශිතයක් නොවන අසත්‍යයක් බවට සැක මතු කර ඇත. 

ඒ සූත්‍රයේ සිංහල පරිවර්තනය බුද්ධ ජයන්ති පරිවර්තනයේ පරිදි මෙසේය.

~~ එකත්පස් ව හුන් ඒ මහණ භාග්‍යවතුන් වහන්සේට තෙල සැල කෙළේ යැ: වහන්ස, “යම් හෙයෙකින් එක්කලෙක (නොකල්හි වන) වැසි වසී නම් එයට හේතු කිමෙක් ද, ප්‍රත්‍යය කිමෙක්” දැයි.

මහණ, වස්සවලාහක නම් දෙවි කෙනෙක් ඇතියහ. ඔවුන්ට යම් කලෙක “අපි සිය කම්සුවෙන් කෙළනමෝ නම් මැනවැ”යි මෙබඳු සිතෙක් වෙයි. ඔවුන්ගේ ඒ සිත පිහිටුවීම අනුව නොකල් වැසි වසී. මහණ, යම් හෙයෙකින් එක්කලෙක නොකල් වැසි වසී නම් එයට මේ හේතු යි. මේ ප්‍රත්‍යයයි. ~~

මේ සූත්‍රය කියවන යම්තරමක හෝ සිහිබුද්ධියක් ඇති අයෙකුට පහත කරුනු වටහා ගත හැකි බව නිසැක නමුත් කොලේ වසා ගසා ත්‍රිපිටකය ව්‍යාජයක්  පෙන්වන අයට මෙසේ පහත දක්වමි.

◾ බුදු රදුන් වැස්ස ඇති වීමට එකම හේතුව වලාහක දෙවියන් ගේ සිත් පිහිටුවිම පමනක් බව දේශනා කොට නැත.

◾ වස්සවලාහක දෙවියන් කම්සැප විදිමට සිතන අවස්ථාවේ ඒ සිත පිහිටුවීම අනුව "අකල් වැසි" ඇතිවන බව පමනක් දේශනා කර ඇත.

◾ හේතුවක් පෙන්වා ඇත්තේ අකල් වැසි ඇති වීම ගැන පමනි.

◾ සාමාන්‍ය පරිදි වැස්ස ඇති වීමට හේතු වන වෙනත් කාරනා දේශනා කොට නැත.

◾වැස්ස ඇති වීමට වෙනත් හේතු කාරනා නොමැති බවක් ද දේශනා කොට නැත.

ඉහත පෙන්වු කරුනු සලකා බැලිමේදි ඉහත සුත්‍රය නවීන විද්‍යානුකුලව වැස්ස ඇති වන ආකාරය පිලිබඳව ඇති සංකල්ප සමග ගැටීමක් නැත.

වැස්ස ඇති වීමට සියලු හේතුන් විද්‍යාවෙන් සොයාගෙන අවසන්ව ඇත්නම් ද ඒ හේතු සියල්ල අතරට වලාහක දෙවියන් ගේ සිත පිහිටුවිම ඇතුලත් නොවන්නේ ද නම් පමනක් ඉහත නිරාගමිකයන්ගේ තර්කය සත්‍ය වනු ඇත. නමුත් කාලගුණ විද්‍යාව එතරම් දියුනුවක් ලබා නැත.

කාලගුණ විද්‍යාවෙන් ලබාදෙන අනාවැකි වැරදි ගොස් අකල් වැසි ඇතිවන අවස්ථා ප්‍රායොගිකව අපි නිතරම අත්දකින බැවින් ඒ පිලිබඳ කිසිදු සැකයක් නොමැත.

ඒ අකල් වැසි වලට හේතු බොහෝ අවස්ථාවන් වල නවින කාලගුණ විද්‍යාවට පැහැදිලි කල නොහැකිව ඇත.

එබැවින් කිසිදු නිරාගමිකයකුට ඉහත සූත්‍ර දේශනාවේ ඇති අකල් වැසි ඇතිවීමට බුදු රදුන් දක්වා ඇති හේතුව වැරදි බව තර්ක කල නොහැකිය. 

එසේ කරන්නේ නම් ඔවුන් ඒ බවට සාධක සාක්ශි සහිතව ඔප්පු කර පෙන්විය යුතුය.

එසේම එම නිරාගමිකයන් කොලේ වසා ව්‍යාජ තර්කයක් මවා පෙන්වන්නේ සූත්‍රයේ ඇති "නොකල්හි ඇති වන වැසි" යන කොටස සම්පුර්ණයෙන් මගහැර එවැනි කොටසක් නොදුටුවා සේ වීම ඔවුනගේ අරමුන කොයිබටද යන්න මනාව පැහැදිලි වෙයි.

අනාගතයේදි විද්‍යාව දියුනු වී බුද්ධ දේශනා වල සඳහන් දිව්‍ය තල වල වෙසෙන සත්ව කොට්ඨාස දැක ගත හැකි උපකරණ නොතනනු ඇතැයි කිව හැක්කේ කාටද?

කිසිවකුට ඇසට නොපෙනි අප අවටම වාසය කල බිලියන ගනන් ක්ෂුද්‍ර ජීවින් අන්වික්ෂය සොයා ගැනිමෙන් පසු අනාවරණය කර ගත හැකි වීම, දැක බලා ගත හැකි වීම ඊට හොඳම උදාහරණයයි.

මනොජ් කුමාර