ෆාහියන් හිමියන් තරණය කල කාන්තාරය යනු මහවැලි ගඟ ද

ෆාහියන් හිමියන් තරණය කල කාන්තාරය යනු මහවැලි ගංගාව ද....

බුදු රදුන් ලංකාවේ බව පවසන සාක්ෂි වල මිථ්‍යාව අංක - 35

ෆාහියන් හිමියන්ගේ දේශාටන වාර්තා විකෘති කර පෙන්වමින් ෆාහියන් හිමියන් වැඩි බුද්ධ දේශය ලෙස ලංකාව පෙන්වන අයෙක් උන් වහන්සේ තරණය කල වාලුකා කාන්තාරය, ලංකාවේ මහවැලි ගඟ හෙවත් මහා වාලුකා නදිය බව යථාර්ථය නමැති වීඩියෝ චැනලයක කරන ප්‍රකාශයක් මේ දිනවල මුහුණු පොතේ දැකගත හැක.

එයට සාධකය ලෙස ඔහු පෙන්වන්නේ ඉංග්‍රීසි පරිවර්තනයේ ඇති ~The river of sand~ යන පාදක සටහනකි.

River of sand හෙවත් වැලි වලින් සැදුණු ගංගාව යන අර්ථය ගෙන කිසිම පදනමක් නැතුව එය මහවැලි ගඟට අතීතයේ භාවිතා කළ වාලුකා නදිය යන්නට සමාන කර ෆාහියන් හිමියන් තරණය කළේ වාලුකා කාන්තාරයක් නොව ලංකාවේ මහවැලි ගඟ බව එහිදී ප්‍රකාශ කරයි.

එසේම ෆාහියන් හිමියන් විස්තර කර ඇත්තේ මහවැලි ගඟ දෙපස ඇති රටවල් ගැන බවද පවසයි.

නමුත් මේ කාන්තාර තරණය ගැන ඇති සඳහන සලකා බලන කළ එය ඇත්තේ දේශාටන වාර්තාවේ චාන් -  ආන් (Chang' an) සිට වාලුකා කාන්තාරය දක්වා, යනුවෙන් හඳුන්වා ඇති පළමුවැනි පරිච්ඡේදයේ ය.

චාං - ආන් යනු චීනයේ එකල අගනුවර වන අතර එහි සිට ගමන ආරම්භ කළ උන් වහන්සේ චීනයේ විවිධ ප්‍රදේශ පසුකර යන ගමන විස්තර කර ඇත.

උතුරට බරව බටහිර දෙසට ගොස් අවසානයේ චීන අධිරාජ්‍යයේ දේශසීමාවේ, සේද මාවතේ වැදගත් සන්ධිස්ථානයක් මෙන්ම ගෝබි කාන්තාරය ආසන්නයේ පිහිටි දේශසීමා ආරක්ෂක නගරයක් වූ Tun-hwang (Dunhuang) වෙත ළඟාවිය.

එහිදී එම නගරයේ ප්‍රාදේශීය පාලකයා ගේ උදව් උපකාර ලබාගෙන කාන්තාරය තරණය කල බව එහි පැහැදිලිව සඳහන් කර ඇත.

එනම් චීන අධිරාජ්‍යයේ ඒවක බටහිර දේශසීමාව ආසන්නයේ මෙම කාන්තාරය පිහිටි බව ඉතාම පැහැදිලිය.

එසේම එම කාන්තාරයේ ඇති උණුසුම් වායු ධාරා සහ භීෂණකාරී බලවේග (Evil spirit) ගැනද සඳහන් කරයි.

එසේම එහි ඉහල අහසේ පක්ෂීන් ද, පහළ භූමියේ සතුන්ද රහිත බවත් මග සලකුණු ලෙස මාර්ගය දිගට විසිරුණු, මියගිය මිනිසුන්ගේ ඇටකටු හැර සිව් දිසාවේම වෙනත් කිසිදු මග සලකුණක් දැකිය නොහැකි බවත් සඳහන් කර ඇත.

එසේම පාදක සටහනේ දී පරිවර්තක විසින් ~The river of sand~ යන්න, ගෝබි කාන්තාරය හැඳින්වූ නම් වලින් එකක් බවත් එය යෙදීම මගින් වාලුකා කාන්තාරය තරණය කිරීම  ගංගාවක් තරණයට සමාන අදහසක් මතුවී කාන්තාරය තරණය කිරීමේදී විඳින්නට වන දුෂ්කරතාවයන් පිළිබඳව පාඨකයාට වැරදි චිත්‍රයක් මැවෙන බවත් සඳහන් කර ඇත.

(ජේම්ස් ලෙග්ගේ මහතාගේ පරිවර්තනය, පළමු පරිච්ඡේදයේ අංක 16 පාදක සටහන)

මේ කරුණු අනුව ඉහත යථාර්ථය වීඩියෝ වේ කරන ප්‍රකාශයන් අනුව මේ ෆාහියන් හිමියන් තරණය කල වාලුකා කාන්තාරය යනු වාලුකා නදිය හෙවත් මහවැලි ගඟ වීමට නම් 

1.) එක්කෝ චීනය ලංකාවේ විය යුතුය.

2.) එසේ නොමැති නම් මහවැලි ගඟ චීනයේ විය යුතුය.

ඔහු කියන ආකාරයට ෆාහියන් හිමි විස්තර කරන රටවල් මහවැලි ගඟ දෙපස ඇති රටවල් නම් චීනය මහවැලි ගඟේ එක් ඉවුරක පිහිටා තිබිය යුතුය.

එසේම ෆාහියන් හිමිගේ විස්තරය අනුව එන වාලුකා කාන්තාරය යනු මොහු කියන ආකාරයට මහවැලි ගඟ නම්

 

මහවැලි ගඟ යනු

එහි ඉහළ අහසේ පක්ෂීන් දක්නට නැති, 

බිම සතුන් දක්නට නැති, 

(බිම යනු වතුර ද/ වතුර රහිත ද යන්න යථාර්ථය චැනලයෙන් විමසා දැනගන්න)

ජල තලය මත විසිරුණු මිනිස් ඇටසැකිලි වලින් මග සොයා ගත හැකි, 

( ඇට සැකිලි ජලයේ පාවුණා ද, මාර්ගය පෙන්වමින් වතුරේ ඒක තැන තිබ්බද යන්නත් යථාර්ථයෙන් විමසා දැනගන්න)

හතර වටේට වෙනත් කිසිදු මග සලකුණක් දැකිය නොහැකි,

(හතර වටේට මහවැලි ගඟේ වෙනත් සලකුණු මුකුත් පේන්නේ නැති තැන් තියෙනවා නම් යථාර්ථයට දැනුම් දෙන්න)

 ප්‍රචණ්ඩ උණුසුම් වායු ධාරා හමන,

(වතුර රත් වෙලා නටනවා ඇති මහවැලි ගඟේ උණුසුම් වායු ධාරා එන්න) 

අරුම පුදුම ස්ථානයක් විය යුතුය. 

මෙවැනි විකෘති සහ කිසිසේත් සිදුවිය නොහැකි සුරංගනා කථා රැසක් මවා පෙන්වමින් ~ෆාහියන් හිමි වැඩි බුද්ධ දේශය~ ලෙස අසත්‍යක් සමාජ ගත කිරීමේ යටි අරමුණ බෞද්ධයන් නිසි ලෙස දුරදක්නා නුවණින් තේරුම් ගත යුතුව ඇත.

තෙරුවන් සරණයි.

මනෝජ් කුමාර