ගෝතම ශ්‍රමණ යනු බුදු රදුන් ද?

ගෝතම ශමන යනුවෙන් සෙල් ලිපිවල සඳහන් වන්නේ බුදු රජාණන් වහන්සේ ද??

බුදු රදුන් ලංකාවේ බව පවසන සාක්ෂි වල මිත්‍යාව අංක -18

බුදුරදුන් ලංකාවේ බව පවසන කණ්ඩායම් ගෝතම ශමන යනුවෙන් ඇති සෙල් ලිපියක් ඉදිරිපත් කරමින් ඒ බුදු රදුන් හට පූජා කළ ලෙනක් බවත් බුදු රදුන්ට පූජා කළ ළෙනක් ඇත්තේ බුදු රදුන් ලංකාවේ නිසා බවත් පවසමින් මතයක් ඇති කිරීමට දැඩි උත්සාහයක් දරමින් සිටියි.

මෙම කරුණ පිළිබඳව පිළිගත් පුරාවිද්‍යා ග්‍රන්ථ සහ මූලාශ්‍ර ඇසුරින් සලකා බලමු. 

ප්‍රථමයෙන් ම කිවයුතු කරුණ නම් මේ සෙල් ලිපි සියල්ල ක්‍රිපූ තුන්වන සියවසෙන් පසු එනම් බුදු රදුන් වැඩ සිටි කාලයෙන් ශතවර්ෂ තුනකට පමණ පසුව කළ සෙල් ලිපි වන බවයි.

එබැවින් බුදු රදුන්ට හෝ බුදු රදුන් ජීවමාන කළ සිටි ශ්‍රාවකයන් ගේ නමින් හෝ එම ශ්‍රාවකයන් ට ලෙන් පූජා කළ බවට සඳහන් සෙල් ලිපි ඇති බව පැවසීම සම්පූර්ණ මිත්‍යා ප්‍රකාශයකි.

බුදු රදුන් ජීවමාන කළ සිටි ශ්‍රාවකයන්ගේ නම් ඇති භික්ෂූන් වහන්සේලා පසුකාලීනව වැඩ සිටි අතර එම පසු කාලීන භික්ෂූන් වහන්සේලා ගේ නම් සඳහන් සෙල් ලිපි බුදු රදුන් ජීවමාන කළ සිටි ශ්‍රාවකයන් ගේ බවට හුවා දක්වමින් මේ පිළිබඳ සත්‍ය නොදන්නා බෞද්ධයන් නොමග යැවීමට මේ පිරිස කටයුතු කරයි.

මොවුන් ගෙන එන මේ බොළඳ තර්කය සත්‍ය වීමට නම් එක නමකින් බුද්ධ ශ්‍රාවකයන් සිටිය හැක්කේ එකම අයෙක් පමණි. මොවුන්ට අනුව බුදු රදුන් ජීවමාන කළ සිටි ශ්‍රාවකයෙකු ගේ නමක් ඇති භික්ෂූන් වහන්සේලා පසුව වැඩ සිට නැත.  

කෙතරම් විහිළු තර්කයක් ද එය.

එසේම,

ගෝතම ශමන යනුවෙන් සඳහන් සෙල් ලිපියක් ලංකාව තුළ හමුවන්නේ කලිඕඩය නම් ස්ථානයෙනි.

( IC volume one , page 37, අංක 486 සෙල් ලිපිය )

පෙළ -

"ගපති පුත තිස පුතාන දෝ බතිකාන ලෙනේ ගෝතම නම සමනේ කරපිතේ" 

තේරුම -

 ගෘහපති තිස්ස ගේ පුත්‍රයන් දෙදෙනාගේ ගුහාව ගෝතම නම් ශ්‍රමණ විසින් කරවන ලදී.

එනම් ගෝතම ශ්‍රමණ යනු මේ පිරිසට අනුව බුදු රදුන් නම් බුදු රදුන් මේ ලෙන කරවූ බවයි. බුදු රදුන් ලෙන් ඉදි කරාද??

 මෙවැනි විහිළු කරුණු ඉතා වැදගත් සාක්ෂි ලෙස මොවුන් හුවා දක්වනු ලබයි.

එසේම ශමන යන හැඳින්වීම යොදා ඇති තවත් සෙල් ලිපි කිහිපයක් ගැන පරණවිතාන මහතා සඳහන් කර ඇත.

තුම්බුල්ලේගල සෙල් ලිපිය

IC volume 1 - page 8 - අංක 103 සෙල් ලිපිය ( තිස්සගොත්ත ශමන )

පුල්මොට්ටායි සෙල් ලිපිය

IC volume 1 - page 29 - අංක 376 සෙල් ලිපිය ( චූල කස්සප ශමන)

යටහලෙන විහාර සෙල් ලිපි

IC volume 1 - page 60 - සෙල් ලිපි අංක 793 සහ page 61 - අංක 796a සෙල් ලිපි. ( මෙහි නමක් සඳහන් නොවන අතර වැසි සමයේ වැඩ සිටින භික්ෂුව ලෙස සඳහන් වෙයි)

ඉතින් මේ අනුව ගෝතම ශමණ යනුවෙන් ඇති සෙල් ලිපි සඳහන බුදු රදුන් නම් ඉහත සෙල් ලිපි වල නම් සඳහන් තිස්සගොත්ත ශමන හා චූල කස්සප ශමන යනුත් බුදු වරුන් විය යුතුය. 

එසේ නොමැති නම් අපේ අතීත බෞද්ධයන් බුදු රදුන් හැඳින්වීමට භාවිතා කළ නාමය වෙනත් භික්ෂූන් හැඳින්වීමට ද යොදාගෙන ඇතැයි උපකල්පනය කළ යුතුයි.

එසේම නම සඳහන් නැති සෙල් ලිපි දෙකේ වැසි සමයේ වාසය කරන ශ්‍රමණ යනුවෙන් හඳුන්වා ඇත්තේ බුදු රදුන් විය යුතුය.

එහෙත් ඒ වැනි ගෞරව රහිත රළු ආකාරයෙන් බුදු රදුන් හදුන්වා ඇතැයි යන උපකල්පනය සිදු විය නොහැක.

එබැවින් ඉහත ශ්‍රමණ යන නම් වලින් (තිස්සගොත්ත හා චූල කස්සප) හැඳින්වූ බුදු වරුන් නොමැති බැවින්ද, සෙල් ලිපිවල කාලනිර්ණය අනුවද, 

ගෝතම ශ්‍රමණ යනුවෙන් සෙල් ලිපිවල හඳුන්වා ඇත්තේ ගෞතම බුදු රදුන් නොව ඊට ශතවර්ෂ ගණනකට පසු කාලයක සිටි ගෝතම නම් භික්ෂුවක් ලෙස ගැනීම තර්කානුකූල වන්නේය. 

එමෙන්ම වඩාත් වැදගත් කරුණ නම් ශමන යන්නෙහි ස්ත්‍රී වාචික පදය වන ශමනි/ ශමනිය යන්න භික්ෂුණින් වහන්සේලා හැඳින්වීම පිණිස සෙල් ලිපිවල යොදාගෙන තිබීමයි.

මිහින්තලේ 

IC volume 1 - page 1 - අංක 8 සෙල් ලිපිය 

IC volume 1 - page 2 - අංක 14 සෙල් ලිපිය හා අංක 15 සෙල් ලිපිය

වෙස්සගිරිය සෙල් ලිපි

IC volume 1 - page 7 - අංක 89 සෙල් ලිපිය

බ්‍රාහ්මණයා ගම සෙල් ලිපි

IC volume 1 - page 13 - අංක 159 සෙල් ලිපිය

එරුපොතාන සෙල් ලිපි

IC volume 1 - page 26 - අංක 332 සෙල් ලිපිය.

මුල්ලිකොළුදුමලායි සෙල් ලිපි

IC volume 1 - page 37 - අංක 482 සෙල් ලිපිය

වලැල්ලුගොඩ කන්ද සෙල් ලිපි

IC volume 1 - page 55 - අංක 725 සෙල් ලිපිය 

මේ සෙල් ලිපි සියල්ලේම ශමන යන්නෙහි ස්ත්‍රී වාචික පදය වන ශමනි/ ශමනිය යන්න භික්ෂුණින් වහන්සේලා හැඳින්වීම පිණිස යොදාගෙන ඇත.

එබැවින් ඉහත සෙල් ලිපිවල ගෝතම ශ්‍රමණ ලෙස බුදු රදුන් හැඳින්වුවා නම් අතීත බෞද්ධයන් එහි ස්ත්‍රි වාචික පදයක් භික්ෂුණින් වහන්සේලා හැඳින්වීම පිණිස යොදා නොගනු ඇත.

එබැවින් මෙම ශමන යන පදය බුදු රදුන් හැඳින්වීම පිණිස නොව පැවිද්දා යන අර්ථයෙන් යෙදූ යෙදුමක් බව තහවුරු වෙයි.

එසේනම් බුදු රදුන් පිළිබඳව සෙල් ලිපි සටහන් ලංකාවේ නැද්ද??

සත්‍යවශයෙන්ම ගෞතම බුදු රදුන් පිළිබඳව පමණක් නොව සිව් බුදු වරුන් ගැනම සඳහන් වන සෙල් ලිපි ලංකාවේ ඇති නමුත් මේ පිරිස එම සෙල් ලිපි පිළිබඳව කිසිදු සඳහනක් නොකරයි.

එම සෙල් ලිපි වලට හොඳම උදාහරණ නම්

පළමුවැනි විජයබාහු රජතුමාගේ අඹගමුව සෙල් ලිපිය යි ( Epigraphia Zeylenica volume II පිටු අංක 202-218)

මෙහි පැහැදිලිව කකුසඳ, කෝණාගමන, කාශ්‍යප සහ ගෞතම බුදු වරුන් ගැන සඳහන් කරන අතර බුද්ධ යන වචනය පැහැදිලිව භාවිතා කර ඇත.

එසේම නිශ්ශංක මල්ල රජුගේ ගල්පොත පුවරු ලිපියෙහි ද බුදු රදුන් පිළිබඳව සටහන් වන අතර එහිද පැහැදිලිව බුද්ධ යන නාමය භාවිතා කර ඇත. (Epigraphia Zeylenica volume II පිටු අංක 98-123)

මේවාට අමතරව නිශ්ශංක මල්ල රජ සමයටම අයත් සේ සැළකෙන මිණිපේ සෙල් ලිපියේ ද ගෞතම බුදු රදුන් පිළිබඳව සටහන් වන අතර ගෞතම බුදු රදුන් ලංකාද්වීපය ට වැඩි බව මේ සෙල් ලිපියේ සඳහන් වෙයි. ( ලක්දිව සෙල් ලිපි - පිටු අංක 406, Epigraphia zeylenica volume V - පිටු අංක 146)

එසේම මේ කණ්ඩායම් මේ සෙල් ලිපි උපුටා නොදක්වන හේතූන් ද මේ සෙල් ලිපි හැදෑරීමේදී පැහැදිලිව පෙනී යයි. 

එනම් මේ විජයබාහු රජුගේ සෙල් ලිපියෙන් දඹදිව හා ඕකාවස් රජපරපුර ගැන සඳහන් වන අතරම ඒ දඹදිව ලංකාව නොවන බවත් පැහැදිලි වෙන අතරම සමනල කන්ද යනු හිමාලය බවට ඔවුන් ගෙන එන මතය ද බිඳ වැටෙයි.

එසේම නිශ්ශංක මල්ල රජුගේ සෙල් ලිපියෙන් විජය කුමරුගේ ලංකාගමනය ගැන සඳහන් වන බැවින් හා කාලිංග වංශය ඉන්දියාවේ බව පැහැදිලි වන බැවින් ඔවුන් එය ඉදිරිපත් නොකරයි.

මිණිපේ සෙල් ලිපියෙන් බුදු රදුන් ලංකාවට වැඩි බව සඳහන් බැවින් කෙසේවත් එය සඳහන් නොකරයි.

මෙම පිළිගත් පුරාවිද්‍යා මූලාශ්‍ර වල සඳහන් වන මේ සාධක සාක්ෂි අනුව ශමණ යන වචනය සෙල් ලිපිවල භාවිතා කර ඇත්තේ පැවිද්දා යන අර්ථයෙන් මිස බුදු රදුන් හැඳින්වීමට නොවන බව තහවුරු වෙයි.

එමෙන්ම ගෝතම ශමණ යනුවෙන් ඇති සඳහන බුදු රදුන් පිළිබඳව නොවන බවත් ඒ බුදු රදුන්ට සියවස් ගණනකට පසු සිටි ගෝතම නම් භික්ෂුවක්/ පැවිද්දෙක් බව පැහැදිලි වෙයි.

මෙවන් පැහදිලි විධිමත් පුරාවිද්‍යා සාධක සාක්ෂි තිබියදී ඒවා සඟවමින් නැති දේවල් මවා පෙන්වමින් මිථ්‍යාදෘෂ්ටියක් සමාජ ගත කිරීමට මේ පිරිස මේ තරම් වෙහෙසක් ගන්නේ ඇයි??

කුමක්ද මොවුන්ට ඇති ලාභය?? 

හෙළ බෞද්ධයන් හට නුවනින් විමසීම පිණිස.....

මූලාශ්‍ර

Inscription of Ceylon - volume I

Epigraphia Zeylenica - volume II

Epigraphia Zeylenica - volume V

ලක්දිව සෙල් ලිපි - කොත්මලේ අමරවංශ හිමි.

ස්තුතිය..

මහාචාර්ය ටි.ජී.කුලතුංග මහතා

මහාචාර්ය කරුණාසේන හෙට්ටිආරච්චි මහතා