ඉන්දියාවේ නැතැයි පවසන ප්‍රකාශ වලට පිළිතුරු.

 බුදු රදුන් ලංකාවේ බව පවසන සාක්ෂි වල මිත්‍යාව. අංක 20

බුදු රදුන් ලංකාවේ බව පවසන පිරිස ඒ බව තහවුරු කිරීමටත් ඉන්දියාවේ නොවන බව පෙන්වීමට ත් ප්‍රකාශ 10ක් ඉදිරිපත් කර ඇත. 

මෙම ප්‍රකාශ විමසා බැලීමට ප්‍රථමයෙන් ඔබ සැමගේ අවධානය මෙම ප්‍රකාශ වල ඇති සුවිශේෂී කරුණක් කෙරෙහි යොමු කිරීමට කැමැත්තෙමි. මෙම ප්‍රකාශ සියල්ලේම බුදු රදුන් හැඳින්වීමට බුදු රදුන්, බුදු රජාණන් වහන්සේ හෝ බුදු හාමුදුරුවන් වැනි ගෞරව නිය වදන් වෙනුවට "බුදුන්" යනුවෙන් පමණක් භාවිතා කර ඇත. 

ඒ ඇයි?? සිතා බලන්න මඳක්.....

දැන් මේ ප්‍රකාශ 10 සත්‍ය අසත්‍ය බව පිළිවෙලින් සලකා බලමු. 

1. ඉන්දියාවේ පිරිසිදු බුදු දහම නැත.

 ගෞතම බුදු රජාණන් වහන්සේ බුද්ධත්වය ලබා ජීවමානව වැඩ සිට වසර 45 බුදු දහම දේශනා කළ, සැරියුත් මුගලන් අග්‍රශ්‍රාවක දෙනම ප්‍රමුඛ අසූමහා ශ්‍රාවකයන් වැඩ සිට ධර්ම දේශනා කළ,

පළමු දෙවන හා තෙවන ධර්ම සංගායනා සිදුකළ, එතැන් සිට ලංකාවට ද ථෙරවාදී බුදු දහම සහ ත්‍රිපිටකය ලබාදුන් භූමියක පිරිසිදු බුදු දහම පැවතියේ නැතැයි පැවසීම විහිළුවකි.

එසේම මෙතෙක් සොයාගෙන ඇති පැරණිම ත්‍රිපිටක ලේඛන වන ක්‍රිව පළවෙනි සියවසට පමණ අයත් Gandhariyan buddhist texts හෙවත් karosthi script හමුවුයේද සොලොස්මහ ජනපද වලින් එකක් වන පැරණි ගාන්ධාර දේශයෙනි.

ඒ පිළිබඳ වැඩිදුර විස්තර පහත ලින්ක් එකෙන් ලබාගන්න. 👇👇

https://m.facebook.com/story.php?story_fbid=10217310144488835&id=1329458126

එසේම වර්තමාන ඉන්දියාවේ බුද්ධගයාවේ සිට ආරම්භ වී ආසියාව පුරා බුදු දහම ව්‍යාප්ත වු ආකාරය මෙම සිතියමෙන් පැහැදිලිව වටහා ගත හැක.

එසේම බුද්ධ පරිනිර්වාණයෙන් පසු විවිධ බාධක මැද ඉන්දියාවේ පැවති බුදු දහම ක්‍රිපූ 3 වන සියවසේ අශෝක යුගයේ ඉන්දියානු උප මහාද්වීපය පුරා සහ ලංකාවද ඇතුළුව ආසියාතික රටවල් ගණනාවකට බුදු දහම ව්‍යාප්ත වු ස්වර්ණමය අවධියක් විය. ඉන් අනතුරුව ක්‍රිව 6 වන සියවසේ ගුප්ත අධිරාජ්‍යය පරිහානියට ලක්වන කාලය වනතුරු පැවති බුදු දහම රාජ්ය අනුග්‍රහය නැතිවීම, හින්දු ආගමේ බලහත්කාරකම් සහ විවිධ ආක්‍රමණ හමුවේ පසු බෑමකට ලක්වූ අතර ක්‍රිව 12 වන සියවසේ සිදුවූ මුස්ලිම් ආක්‍රමණ සමග දැඩි පරිහානියකට පත්විය. කෙසේ වුවත් 2011 සංගණනය අනුවත් මිලියන 8.4 ක බෞද්ධ ජනතාවක් ඉන්දියාව තුල සිටින බව නිල වශයෙන් තහවුරු වි ඇත. එබැවින් මේ පැනය බොදුනුවන් නොමග යැවීම පිණිස ඉදිරිපත් කළ එකක් බව පැහැදිලිය.

ඉන්දීය සංගණන දෙපාර්තමේන්තුව.

https://censusindia.gov.in/Census_And_You/religion.aspx

2. ඉන්දියාවේ පාළි නැත.

මිහිඳු හිමියන් පාළි ත්‍රිපිටකය ලංකාවට රැගෙන ආවේ ඉන්දියාවේ මගධ අධිරාජ්‍යයේ සිටයි. ඉන්දියාවේ පාළි නොතිබුනේ නම් පාළි ත්‍රිපිටකය ලංකාවට කොහෙන්ද?? 

එසේම මේ ජම්බු පිරිසම දෝෂාරෝපණය කරන ආකාරයට ඉන්දියාවේ සිට වැඩි බුද්දගෝෂ හිමියන් ලංකාවේ තිබූ හෙළ අටුවා පාළියට පරිවර්තනය කර රැගෙන ගොස් ඇත. එසේනම් ඉන්දියාවේ නොතිබූ භාෂාවක ත්‍රිපිටකය මිහිඳු හිමියන් ලංකාවට ගෙන ආවේ කොහෙන්ද?

මිහිඳු හිමියන් ලංකාවට වැඩි බව තහවුරු කල ලිපිය 👇👇 

https://m.facebook.com/groups/311232793326531?view=permalink&id=312758009840676 

 

එසේම බුද්ධඝෝෂ හිමියන් ඉන්දියාවේ නොතිබූ භාෂාවකට අටුවා පරිවර්තනය කර රැගෙන ගියේ  කුමකටද?? මෙවැනි විහිළු ප්‍රකාශ වලින් මොවුන් බලාපොරොත්තු වන්නේ මොනවා ද? 

3. ඉන්දියාවේ ධාතු නැත.

මේ ප්‍රකාශයේ මොහු ධාතු යනුවෙන් අදහස් කරන්නේ කුමක්දැයි කියා පැහැදිලි නැත. 

බුදු රදුන්ට අදාල සර්වඥ ධාතු ලෙස උපකල්පනය කළහොත් මේ ප්‍රකාශය කිසිදු පදනමක් නැති හිතළු ප්‍රකාශයක් වන්නේ අදටත් දිල්ලි කෞතුකාගාරයේ වෙනම අංශයක දැඩි ආරක්ෂාව මැද බුදු රදුන්ගේ සර්වඥ ධාතූන් වහන්සේලා විශාල ප්‍රමාණයක් ප්‍රදර්ශනය කරන බැවිණි. එසේම මෙම ධාතූන් වහන්සේලා රාජ්‍ය අනුග්‍රහය යටතේ ලංකාවට ද කිහිප වරක් සැදැහැවත් බෞද්ධ යන්ට වැඳ පුදා ගැනීම පිණිස වැඩම කරවා ඇත. 

වීඩියෝව 👇👇👇

https://youtu.be/1HQiyRm9l6E

නව දිල්ලි කෞතුකාගාර නිළ වෙබ් අඩවිය

http://www.nationalmuseumindia.gov.in/departments-archaeology.asp?lk=dp2#Buddhist

4. ඉන්දියාවේ පිරිසිදු පොත් නැත.

මෙම ප්‍රකාශ සිදු කරන අයගේ මානසික මට්ටම පිළිබිඹු කරන අර්ථයක් රහිත මුග්ධ ප්‍රකාශයක් හෙයින් ඊට පිළිතුරු දීම අනවශ්‍ය යැයි සිතමි.

5. ඉන්දියාවේ සංග ශාසනයක් නැත.

පළවෙනි ප්‍රකාශයට දුන් පිළිතුර මේයටද අදාල වෙයි. 

එසේම මිහිඳු හිමියන් ශාසනය පිහිටවූ පසු ලංකාවේ ද සංඝ ශාසනය පිරිහී ගොස් අවස්ථා හතරකදී උපසම්පදාව වෙනත් බෞද්ධ රටවල් වලින් ගෙනැවිත් නැවත සංඝ ශාසනය ස්ථාපනය කිරීමට සිදුවිය.

6. ඉන්දියාවේ බුදුන්ට පිදු ලෙන් ලිපි නැත. 

ඇත්ත. ඉන්දියාවේ බුදු රදුන්ට එලෙස ගල් ලෙන් පූජා කළ බවක් අසන්නට නැත. නමුත් ගල් ලෙන් වෙනුවට බුදු රදුන් ගේ ශ්‍රාවකයන් වූ රජවරුන්, සිටුවරුන් හා සිටු දියණියන් පූජා කළ ආරාම සංකීර්ණ (වේළුවනාරාමය, ජේතවනාරාමය, පූර්වාරාමය සහ ඝෝෂිතාරාමය වැනි) වල නටබුන් පුරාවිද්‍යා ස්ථාන ලෙස සොයාගෙන ඇති අතර සුවහසක් ලෝක බෞද්ධ ජනතාවගේ නිරන්තර වන්දනාවට ලක්වෙයි. 

ඉන්දීය පුරාවිද්‍යා නිළ වෙබ් අඩවිය

https://asi.nic.in/saheth-jetavana/

එසේම ලංකාවේ ද බුදු රදුන්ට පූජාකළ ගල් ලෙන් සොයාගෙන නොමැති අතර ආරාම ද නැත. බුදු රදුන්ට පිදු ගල් ලෙන් ඇති බවට කරන ප්‍රකාශයේ මිත්‍යාව මෙතනින් බලන්න 👇👇👇

https://vikurthiyataerehiwa.blogspot.com/2020/07/18.html?m=1

7. ඉන්දියාවේ සාහිත්‍යයේ හෝ ග්‍රීක ලේඛන වල බුදුන් නැත.

ඉන්දීය සාහිත්‍යයේ බුදු රදුන් නැතැයි පවසන මොහුගේ ප්‍රකාශයට හොඳම පිළිතුර ක්‍රිව පළවෙනි සියවසේ අශ්ව ගෝෂයන් විසින් රචිත "බුද්ධ චරිත" මහා කාව්‍ය හා නන්ද කුමරු පිළිබඳ රචිත "සුන්දරානන්දම්" යන කාව්‍යයන් යුගලය යි. බුදු රදුන් ගේ චරිත කථාව පිළිබඳවම කාව්‍යයක් ඇති විට ඉන්දීය සාහිත්‍යයේ බුදු රදුන් පිළිබඳව නැතැයි පැවසීම කෙතරම් විහිළුවක් ද??? 

බුද්ධ චරිත මහා කාව්‍ය පිළිබඳ ලිපිය.👇👇

https://m.facebook.com/story.php?story_fbid=10217285940763757&id=1329458126

බුදු රදුන්/ බුදු දහම හා ග්‍රීකයන් අතර සම්බන්ධතාව පිළිබඳව තොරතුරු මෙයින් ලබාගත හැක. 👇👇

https://en.m.wikipedia.org/wiki/Greco-Buddhism

රෝමය හා බුදු රදුන් පිළිබඳ විස්තර

https://en.m.wikipedia.org/wiki/Buddhism_and_the_Roman_world

8. ඉන්දියාවේ බුදුන්ගේ සමකාලීන චරිතවලට සාධක නැත. ඔලුවෙ සිටින්නේ පන්සලේ දුටු චිත්‍රයී.

බුදු රදුන්ගේ සමකාලීන චරිත වල සාධක විශාල ප්‍රමාණයක් ඉන්දියාවේ ඇති අතර සැවැත් නුවර ඇති අනාථපිණ්ඩික මාළිගය, අංගුලිමාල සිටු මාළිගය, අනේපිඩු සිටුතුමා ඉදිකළ ජේතවනාරාමය, විශාකා මහා උපාසිකාව ඉදිකළ පූර්වාරාමය, රජගහ නුවර බිම්බිසාර රජු පිළිබඳ පුරාවිද්‍යා සාධක මේවාට උදාහරණ කිහිපයකි. ඉන්දීය පුරාවිද්‍යා අංශ මේ ස්ථාන පිළිබඳව ගවේෂණ සිදුකර තහවුරු කර ඇත.

බිම්බිසාර රජු සිර ගත කර තිබූ බව පවසන මාළිගය

https://www.incredibleindia.org/content/incredibleindia/en/destinations/rajgir/bimbisaras-jail.html

අජාසත් රජුගේ බලකොටුව

https://www.incredibleindia.org/content/incredibleindia/en/destinations/rajgir/ajatshatru-fort.html

එසේම බුදු රදුන් කළ විසූ ජෛන මහාවීර හෙවත් නිගණ්ඨ නාත පුත්ත පිළිබඳ ජෛන වාර්තා මේ පිළිබඳව හොඳ උදාහරණ වෙයි.

9. ඉන්දියාවේ ගල් ආරාම නැත.

මේ ප්‍රකාශ කරන අයගේ නොදැනුවත්කම ප්‍රදර්ශනය කරන හෝ හිතා මතාම බෞද්ධයන් නොමග යවන මුග්ධ ප්‍රකාශයක් බව පැහැදිලිව කිව යුතුයි.

ඉන්දියාව තුල පිහිටි ලෝක ප්‍රසිද්ධ බෞද්ධ ලෙන් විහාර සංකීර්ණ රාශියක් ඇති අතර අජන්තා සහ එල්ලෝරා විහාර සංකීර්ණ මින් ප්‍රධාන වේ.

යුනෙස්කෝ ලෝක උරුමයක් වන අජන්තා බෞද්ධ විහාර සංකීර්ණය 👇👇

https://whc.unesco.org/en/list/242/

යුනෙස්කෝ ලෝක උරුමයක් වන එල්ලෝරා විහාර සංකීර්ණය 👇👇

https://whc.unesco.org/en/list/243/

10. ඉන්දියාවේ ත්‍රිපිටකයේ විස්තර කරන පරිසරය නැත. 

ත්‍රිපිටකයේ විස්තර කරන නගර, ගම්, ස්ථාන, විහාර ආරාම, කඳුවැටි හා ගංගා සියල්ල ඉන්දියාවෙන් හමුවෙද්දී ත්‍රිපිටකයේ විස්තර කරන පරිසරය ඉන්දියාවේ නැතැයි කිම හිතා මතාම බෞද්ධයන් නොමග යැවීම පිණිස කරන ප්‍රකාශයකි. 

සැවැත් නුවර, බරණැස්, බුද්ධගයා, ලුම්බිණි, කුසිනාරා, රජගහ නුවර, පාටලිපුත්‍ර, කපිලවස්තු වැනි නගර රාම ග්‍රාම වැනි ගම්, ජේතවනාරාමය, බුද්ධගයාව, පූර්වාරාමය, ඝෝෂිතාරාමය, වැනි බුදු රදුන් කළ පැවැති විහාර ආරාම, ගංගා යමුනා හා නේරංජනා වැනි ගංගා, හිමාලය වැනි කඳු, ගිජ්ජකූට පර්වතය වැනි ත්‍රිපිටකය විස්තර වන සියල්ල තිබියදී එම පරිසරය නැතැයි පැවසීම විහිළුවකි.

මේවාට අමතරව ත්‍රිපිටකයේ විස්තර වන පැහැදිලි වර්ෂා ඍතුවක් ඉන්දියාවේ ඇති අතර බුදු රදුන් ඊට අනුව වස් වැසීම අනුදැන ඇත. නමුත් දූපතක් වන ලංකාවේ පැහැදිලි වර්ෂා ඍතු දෙකක් දක්නට තිබීමෙන් ත්‍රිපිටකයේ විස්තර සමග ලංකාව පැහැදිලිවම නොගැළපෙයි.

මේ පිළිබඳ වැඩි විස්තර 👇👇👇👇

https://m.facebook.com/groups/311232793326531?view=permalink&id=322027435580400

මෙවැනි බොරු ප්‍රකාශ බුදු රදුන්ට සියුම් අපහාසයක්ද වන ලෙස ඉදිරිපත් කිරිම තුලින් මේ පුද්ගලයන් උත්සාහ කරන්නේ බුදු රදුන් පිළිබඳ බෞද්ධයන්ගේ සිත් වල ඇති ගෞරවය ට හානි කිරීම නෙවෙයිද? 

මෙවැනි අමූලික බොරු ප්‍රකාශ සිදු කරමින් ඇතැම් පිරිස් හිතා මතා ගෙනයන මේ බෞද්ධයන් නොමග යවා බුදු රදුන් හා බුදු දහම පිළිබඳ සැකය අවිශ්වාසය ගොඩනැඟීමේ අන්තවාදී වැඩ පිළිවෙල මානව වටහා ගෙන තීරණාත්මකව පරාජය කළ යුතු කාලය දැන් එළඹ ඇත. 

තෙරුවන් සරණයි..