නියම සල් ගස කුමක්ද?

බුදු රදුන් ලංකාවේ බව පවසන සාක්ෂි වල මිත්‍යාව. අංක - 13

සත්‍ය සල් ගස කුමක්ද????

බුදු රදුන් ඉපදුන හා පිරිනිවන් පෑම යන අවස්ථා දෙකෙහි දීම සල් ගස ගැන බෞද්ධ සාහිත්‍යයේ සඳහන් වේ.

මෙම නිවැරදි සල් ගස පිළිබඳව බොහෝ අයට නිවැරදි අවබෝධයක් නොමැති බව බොහෝ දෙනෙක් කරන ප්‍රකාශ වලින් තහවුරු වන කරුණකි.

එබැවින් කුමක්ද මේ බුදු රදුන්ට සම්බන්ද නිවැරදි සල් ගස යන්න සොයා බලමු.

විවාදයට තුඩු දී ඇත්තේ ගස් වර්ග දෙකකි. එනම්

a) ලංකාවේ විහාරස්ථාන වල දක්නට ලැබෙන අප සල් යනුවෙන් හඳුන්වන ශාකය හා

b) උතුරු ඉන්දියාවේ දක්නට ලැබෙන සල් හෙවත් සාල නමින් හැඳින්වෙන ශාකය යි.

මේ ශාක දෙක ගැන කරුණු සලකා බලමු.

1) ලංකාවේ අප සල් යනුවෙන් හඳුන්වන ශාකය.

a) කාලතුවක්කු උණ්ඩ ගස හෙවත් cannon ball tree යන නමින් හඳුන්වන මෙම ශාකයේ උද්භිද විද්‍යාත්මක නාමය Couroupita guianensis යන්නයි.

b) එහි නමින්ම පෙනෙන පරිද්දෙන් මෙහි නිජභූමිය ආසියානු කලාපයෙන්ද බැහැර මධ්‍යම හා දකුණු ඇමරිකාවේ ඝර්ම කලාපීය වනාන්තර වලට හිමි වෙයි.

c) මෙම Couroupita ගණයේ තවත් ශාක කිහිපයක් ඇති අතර ඒවා සියල්ල දකුණු ඇමරිකානු කලාපයට සීමාවී ඇත.

d) මෙම ශාකයේ වසර පුරාම මල් හටගන්නා අතර 6cm පමණ අප කවුරුත් දැක ඇති ලොකු මල් ශාකයේ කඳ දිගට හටගනී.

e) එසේම මෙම ගසට කාලතුවක්කු උණ්ඩ ගස යන නම ලැබීමට හේතු වන කාලතුවක්කු උණ්ඩයක් වැනි ගෙඩි කඳ දිගට හටගනී.

f) විශේෂිත කරුණ වන්නේ මේ ශාකය අපේ රටේ තබා ආසියානු කලාපයේ වත් නොමැති ගසක් වන අතර වර්ෂ 1881 දී බ්‍රිතාන්‍යයන් විසින් ලංකාවට හඳුන්වා දී ඇත.

g) බ්‍රිතාන්‍යයන් විසින් හඳුන්වා දුන් මෙම ශාකයට සල් යන නම ව්‍යවහාර වන්නට පටන් ගත්තේ කෙසේද යන්න පිළිබඳ නිශ්චිත තොරතුරක් නැත.

h) මෙහි මලේ මැද ඇති බුබ්බුලාකාර කුඩා කොටස ශිව ලිංගයක් ලෙස සලකන හින්දු බැතිමතුන් එය වසා ගෙන උඩින් ඇති පේත්ත නාග පෙනයක් ලෙස සලකයි.

i) මගේ පෞද්ගලික මතය නම් මේ

මැද කොටස කුඩා චෛත්‍යක් ලෙසද දිස් වන බැවින් බෞද්ධයන් බුදු රදුන්ට සම්බන්ද සල් ලෙස වරදවා ව්‍යවහාර කරන්නට ඇති බවයි.

https://en.m.wikipedia.org/wiki/Couroupita_guianensis

2. උතුරු ඉන්දියාවේ ඇති සල් ශාකය

a) සල්, ශාල නමින් හැඳින්වෙන මෙම ශාකය Shorea robusta යන විද්‍යාත්මක නාමයෙන් හඳුන්වයි.

b) මෙහි නිජභූමිය මධ්‍යම හා උතුරු ඉන්දියාව, නේපාලය සිට බංග්ලාදේශය හරහා බර්මාව දක්වා ප්‍රදේශය විහිදී ඇත.

c) ජුනි මාසයේ පමණ ගස පුරා විහිදී පැතිරී කුඩා කහපාට මල් හටගන්නා මෙහි පළ දරනු ලබන්නේ ජූලි මාසයේ පමණය.

d) බුදු දහමට අමතරව සල් ගස හින්දු හා ජෛන ආගම් වලද පූජනීය තත්වයෙන් සලකනු ලබයි.

e) shorea ගණයට අයත් අනෙක් ශාක විශේෂ සියල්ලම පාහේ ආසියාව නිජභූමිය කරගත් ශාකයන් වෙයි.

https://en.m.wikipedia.org/wiki/Shorea_robusta

3. මෙම ගස් දෙකෙන් බුදු රදුන්ට සම්බන්ද සල් ශාකය කුමක්ද යන්න විග්‍රහ කර බලමු.

4. 1881 වර්ෂයේ බ්‍රිතාන්‍යයන් විසින් ලංකාවට හා ආසියාවට හඳුන්වා දුන් cannon ball ශාකය බුදු රදුන් ඉපදුන හෝ පිරිනිවන් පෑ සල් ශාකය වීමට කිසිදු ඉඩක් නැත.

5. මෙම cannon ball ශාකය 19 වන ශතවර්ෂයට පෙර ආසියාව පුරා හෝ ලංකාව පුරා පැතිරී තිබූ බවට ඓතිහාසික හෝ උද්භිද විද්‍යාත්මක සාක්ෂි නැත.

6. එසේම shorea robusta ශාකය බුදු රදුන් උපත ලද ලුම්බිණිය හා පිරිනිවන් පෑ කුසිනාරා නුවර උපවර්තන සල් උයනේ වැනි ප්‍රදේශ නිජභූමිය කරගෙන අදටත් ඇති ශාකයකි.

7. එසේම බුදු රදුන් පිරිනිවන් පෑ අවස්ථාවේ තිබූ සල් ශාකය ගැන මහා පරිනිර්වාණ සූත්‍රයේ කරුණු දක්වා ඇත. ඒ කරුණු මගින් තහවුරු වන්නේ කුමක්ද යන්න විමසා බලමු.

8. පරිනිර්වාණ සුත්‍රයේ පැහැදිලිව උපවර්තන සල් උයනේ බුදු රදුන් සල් ගස් දෙකක් අතර උතුරු දෙසට හිස තබා සැතපුන බව සදහන්ය.

9. එසේම මෙම සල් ගස් වල සැමතැනම මල් පිපි මල් වලින් ගැවසී තිබූ බව පැහැදිලිව සඳහන් කර ඇත.

10. එබැවින් කඳේ යට කොටසේ පමණක් මල් පිපෙන cannon ball ශාකය මේ විස්තරයට නොගැළපෙයි.

11. එමෙන්ම මහා පරිනිර්වාණ සුත්‍රයේ පැහැදිලිව බුදු රදුන් දේශනා කරන ආකාරයට දෙවියන් විසින් මේ සල් මල් බුදු රදුන්ගේ සිරුර මත වැටෙන සේ මේ ගස් සොළවන ලද බවයි.

12. එබැවින් ගසේ කඳේ පමණක් මල් පිපී තිබූ cannon ball ගස් දෙකක් අතර බුදු රදුන් සැතපී සිටියේ නම් ගස් සොලාවන විට බුදු රදුන්ගේ සිරුරට මල් වැටීම සිදු නොවීය හැකි අතර shorea robusta ගස් දෙකක් අතර සැතපී සිටියේ නම් මේ විස්තරය කදිමට ගැලපෙයි.

13. එසේම cannon ball ශාකයේ විශාල මල් ඇගට වැටුණේ නම් සිදුවන අපහසුතාවය සිතා ගත හැකි අතර දෙවියන් විසින් බුදු රදුන් පිරිනිවන් මංචකයේ වැතිරී සිටින විට ඒවන් විහිළු සිදු කළේ යැයි සිතීම පවා මිථ්‍යාවකි.

14. එසේම වර්ෂයේ සෑම කලයකම පාහේ මල් සහ ගෙඩි දකින්නට ඇති මෙම cannon ball ගස් සෙළවුවේ නම් මෙහි ඇති කාලතුවක්කු උණ්ඩ වැනි ගෙඩි සිරුර මතට වැටුණේ නම් සිදුවන දේ සිතා ගත හැකි නොවන්නේද?

15. එසේම පරිනිර්වාණ සුත්‍රයේ පැහැදිලිව දක්වා ඇති පරිදි මෙම සල් මල් අකලට පිපුන මල් වෙයි.

16. වර්ෂය පුරාම මල් පිපෙන cannon ball ශාකයේ අකලට මල් පිපෙන්නේ කෙසේද??

17. Shorea robusta වල මැයි මාසයේ මල් පිපී තිබීම අකලට සිදු වූ බව පවසන ත්‍රිපිටක දේශනාව සමග මැනවින් ගැලපෙන්නේ ය.

18. එබැවින් ත්‍රිපිටකයේ සඳහන් විස්තරය සමග මැනවින් ගැලපෙන්නේ shorea robusta හෙවත් සල් ගස මිස ලංකාවේ දක්නට ලැබෙන cannon ball (Couroupita guianensis) ශාකය නොවන බව තහවුරු වෙයි.

19. අන්තර්ජාලයේ ද මෙම ශාක වර්ග දෙක මාරු කර පටලවා සඳහන් කර ඇති අවස්ථා බහුල වන අතර බුදු රදුන් ලංකාවේ බව පවසන පිරිස් මේ වැරදි තොරතුරු කර තබාගෙන shorea robusta යනු ලංකාවේ ඇති cannon ball ශාකයම බව තහවුරු කිරීමට බොළඳ උත්සාහයක් දරමින් සිටියි.

20. සුද්දන් ඉතිහාසය විකෘති කළ බව පවසමින් හෙළ ඉතිහාසය සුද්දගෙන් බේරා ගැනීමට සැරසෙන මොවුන් සුද්දා දකුණු ඇමරිකාවෙන් ලංකාවට ගෙන ආ cannon ball ගසේ සරණ පැතීම දෛවයේ සරදමක් නොවන්නේද????

සැබෑ හෙළ බෞද්ධයන්ගේ නුවණැති විමසුමට පමණි.....

තෙරුවන් සරණයි.

මනෝජ් කුමාර.